المشاركات
متي بداء حبي للخياطة
بدأ حبي للخياطة في الصغر عمري كان اقل من 13 سنة
كانت الخياطة بالنسبة ليا متعة
صورة المكنة في عيني من أجمل الصور
كنت بنام واصحى أحلم بيها
كانت شاغلة كل تفكيري
بس للأسف وقتها مكنش في مجالات للتعليم متاحة زي دلوقتي زي النت او الكورسات
لكن كان عندي اصرار غير عادية علي التعليم
روحت قصر ثقافة قريب من بيتي للتعليم نفسي اعرف اقص واخيط وهنا كانت الصدمة بنتعلم باترون بطريقة مملة جدا ومش فاهمة اي حاجة لدرجة افتكرت اني غبية
ويكاد الاستاذة اللي كانت بتعلمني تكرهني في الخياطة نفسها واني مش هقدر اتعلم ولا اكون زي ما بحلم
وقتها قررت اني مش هكمل معها عشان مكرهش الخياطة اكتر من كده بس لسه اصراري وحبي للخياطة موجوده
فكانت في خياطة ساكنة جنبي ماشاء الله عليها قولت اروح اقعد معاها كل يوم شوية القط منها واتعلم
كل يوم اروح اقعد معها بس مش عاوزه تعمل حاجة قدامي ولا تعرفني حاجة مع انها كانت ست طيبة وانا بحبها
بس للأسف في ناس كتير ربنا كرمهم بعلم فمتخيلين ان لو حد اتعلم منهم ولا اخد منهم سر المهنة زي ما بيقولوا ان دا حيقلل رزقهم او يقصر عليهم
وانا من النوع العنيد اما بحب حاجة مش برتاح الا لما اعملها
قررت اتعلم مع نفسي اشوف اي موديل واحاول اشوف معمول ازاي ومقصوص ازاي بوظت كتير ومكنش بيهمني وكل اللي كان شاغل بالي اني اتعلم وافصل الحاجة اللي بحبها والموديل اللي نفسي فيه لغاية اما ربنا كرمني واتعلمت وبقا وقت امتحاناتي في ثانوي بدل ما اذاكر ليلة الامتحان انا بفصل فستان اروح بيه الامتحان
اوعي تكوني بتحبي حاجة وتستمري مع حد يكرهك فيها
كوني عندك اصرار
واعرفي ان مفيش اي حاجة في الدنيا صعبة
ربنا يناولكم كل اللي في بالكم ويحققلكم اللي نفسكم فيه
بحبكم في الله
#رجاء_ابراهيم
ليست هناك تعليقات:
إرسال تعليق